ज्योतिषी राखेर यसरी गरिन्छ ठगी
- Thursday, Dec 08, 2016
- 17:52 PM ( 2 years ago )
- Total Views: 22.0 K
नारायण अधिकारी/उज्यालो ।
काठमाडौं, मंसिर २३ – ललितपुर इमाडोलको एक घरमा सिद्धीदाता इन्टरप्राइजेज प्रालिको बोर्ड झुण्डिएको हुन्छ । कहिले त्यो बोर्ड हराउँछ, कहिले देखिन्छ । बोर्ड हराएसँगै सिद्धीदाता इन्टरप्राइजेजले राखेका सेक्युरेटी गार्ड पनि हराउँछन् ।
फेरि केही दिनमा बोर्ड फेरि पहिलेकै ठाउँमा आउँछ र सेक्युरेटी गार्ड पनि यथावत् । यो क्रम चलिरहन्छ । घरबेटीलाई पनि थाहा हुँदैन बोर्ड हराउनु र राख्नुको कारण । मान्छे छक्क पर्छन् । 
मनोज बहादुर सिंह । उनलाई सबैले राजा भनेर चिन्छन् । जसले आफ्नो कार्यालय सिद्धीदाता इन्टरप्राइजेजलाई यसरी सजाएका हुन्छन्, त्यहाँ पुग्ने जोकोहीलाई लाग्छ उनी ठूलै राज खानदानका मान्छे हुन्, सम्बन्ध ठूलै मान्छेसँग छ । काठमाडौं महालक्ष्मीस्थान–१६ का राजाले आफ्नो परिचय पनि त्यसैगरी दिन्छन्, आफ्नो सम्बन्ध उच्चपदस्थ कर्मचारी, नेता, मन्त्री तथा आर्मी पुलिसका हाकिमहरुसँग छ । राजाको अफिसको कोठाले उनको भनाईलाई पनि हो जस्तै बनाउँछ ।
जहाँ विभिन्न मन्त्री, नेता तथा उच्च पदस्थ कर्मचारीसँग बसेर खिचेका फोटाले राजाले आफ्नो कोठा सजाएका हुन्छन् । उनको लवाईखवाई बोलीचालीको रवाफ पनि त्यसै किसिमको हुन्छ । यतिमात्र हैन राजा चार, पाँचजना अंगरक्षक अघिपछि नलगाई कतै पनि हिँड्दैनन् । महिनैजसो फेरिने कारले राजा ठूलै मान्छे भएको विश्वास लाग्छ । उनी यसैगरी मान्छेलाई आफ्नो जालमा फसाउन सफल हुन्छन् ।
अन्ततः उनी आफै जालमा फस्छन् । एक हप्ताको लामो प्रयासपछि महानगरीय प्रहरी परिसर ललितपुरले उनलाई गएको शनिबार पक्राउ गरेको छ । उनी अहिले ललितपुर प्रहरी परिसरको हिरासतमा छन् ।
यसो गर्थे राजा
ठग्ने बहाना बनाउँदै उनले महालक्ष्मीस्थानमा सिद्धीदाता इन्टरप्राइज प्रालि खोले । कार्यालयको साजसज्जा भव्य बनाए । सुरक्षा गार्ड र अंग रक्षक राखे । आफू मन्त्री तथा नेताको मान्छे भन्दै मन्त्रीसँगै अमेरिका, अष्टे«लिया, क्यानाडा लगायतका युरोप अमेरिकाका देश पठाउने भन्दै पैसा असुल्न थाले । महानगरीय प्रहरी परिसर ललितपुरका डिएसपी इश्वर कार्की भन्नुहन्छ, ‘यसको लवाई, खवाई, रवाफ नै ठग्ने हतियार बन्यो, मान्छेले त्यसैलाई पत्याए । युरोप, अमेरिकाको सपनामा फसे, यो त राष्ट्रिय ठग नै रहेछ ।’ 
डिएसपी कार्कीका अनुसार उनले आफ्नो हाई प्रोफाइललाई नै ठग्ने हतियार बनाए । राजाले अफिसमा गेटमा सुरक्षा गार्ड राखेका थिए । अमेरिका, अष्ट्रेलिया जाने भन्दै लाखौं बुझाएकाहरु राजालाई भेट्न भन्दै उनको कार्यालय पुग्थे । ‘हामी राजाको अफिस जान्थ्यौं, तर हामीलाई सुरक्षा गार्डले राजासाब बिजी हुनुहुन्छ भन्दै गेटमै रोक्थे । त्यहाँबाट बल्लतल्ल माथि पुगेपनि राजाको अंगरक्षक कम्मरमा खुकुरी भिरेर बसेका हुन्थे । राजासाब बिजी हुनुहन्छ, भन्दै हामीलाई भित्र पस्न दिईंदैन थियो’ एक पीडितले भने ‘बल्लतल्ल राजाको कोठामा पुगेपनि बिजी छु भन्दै पाँच मिनेट मात्र कुरा गर्थे, काम हुनै लागेको भन्दै आश्वासन दिन्थे ।’
यति मात्र राजाले कति जनालाई त भिषा आयो भन्दे भाइबरमा नक्कली भिषा समेत पठाउने गरेको डिएसपी कार्कीले बताउनुभयो । उनले सिल्क एयरलाईनको टिकट काटेर समेत भिषा आयो भन्दै कतिपयलाई एयरपोर्ट सम्म पु¥याएको प्रहरीले जनाएको छ ।
ज्योतिषीको समेत सहयोग
उनले अफिसमा केही कर्मचारी, सुरक्षा गार्ड, बडीगार्ड राखेका थिए । यतिले मात्र उनलाई पुगेन, मान्छे खोजेर ल्याउने एजेन्ट खडा गरे । जसले बिदेसिने सिलसिलामा भौंतारिएकालाई खोजेर राजालाई भेटाउँथे ।
यसरी ठग्दै आएका राजाले नयाँ तरीका अपनाए, ज्योतिषी । राजाको आग्रह अनुसार सलार्हीको राजघाट–२ घर भएका रमेशकुमार खत्री ज्योतिषी बने । खत्रीले राजाकै कार्यालयमा ज्योतिष काम गर्न थाले । ज्योतिषी बनेका खत्रीकोमा हात हेराउन मान्छेको भिड लाग्न थाल्यो । खत्रीले सबैलाई भन्ने गर्थे ‘विदेश जानु विदेशको राम्रो योग छ ।’
हात हेराउनेले सोध्थे ‘कुन देश जाँदा राम्रो होला गुरु ?’
‘युरोप, अमेरिकातिर ट्राइ गर्नु १०० प्रतिशत सफल हुन्छ, अहिले नै ट्राइ गर्नुभयो भने त झन राम्रो छ, यही नजिकको सिद्धीदाता कन्सल्टेन्सीमा जानु राम्रो छ, तपाईंको हुनसक्छ ।’
जयोतिषी कुरापछि हात हेराउनेहरु नजिकैको राजाको सिद्धीदाता इन्टरप्राइजेजमा जान्थे ।
राजालाई मंसिर १८ गते प्रहरीले पक्राउ गरेपछि आफू पनि ठगिएको भन्दै ज्योतिषी खत्री १९ गते महानगरीय प्रहरी परिसर ललितपुर पुगे । तर सबै कुराको अनुसन्धानबाट पत्ता लगाएको प्रहरीले पक्राउ गर्न खोजेको ज्योतिषी नै आफै ठगिएको भन्दै आएपछि उनलाई पनि प्रहरीले थुनेको छ ।
पासपोर्ट कलेक्शदेखि वितरण समारोहसम्म
युरोप, अमेरिका पठाउने भनेर जम्मा गरिएका पासपोर्ट उनले अब सम्बन्धित व्यक्तिलाई दिने र विदेश पठाउने भन्दै गएको असार २० गते इन्द्रेणी फुड ल्याण्डमा पासपोर्ट वितरण समारोह आयोजना गरे ।
जसमा राजाले प्रमुख अतिथी तत्कालीन पराराष्ट्रमन्त्री कमल थापा, अतिथी तत्कालीन श्रममन्त्री दीपक बोहोरा रहेको भन्दै पासपोर्ट वितरण समारोहको आयोजना गरे । ‘पछि मन्त्री थापा र बोहोरा नआएपछि शंका लागेर हामीले सोध्यौं, उहाँहरु आउनभ्यानु भएन मन्त्रीको सट्टा उहाँ आउनुभएको छ भन्दै हामीलाई एउटा झण्डावाला कार देखाइयो’ एक पीडितले भने । 
मन्त्रीको रवाफ देखाएर उनले फुडल्याण्डमा दुई, तीनलाख नै खर्च गरे । पछि पासपोर्ट दिनुको सट्टा उल्टै तिमीहरुलाई पासपोर्ट दियो भने सबै कुरा भन्छौं, तिमीहरुले पासपोर्ट टिकट सबै भोलि पाउँछौ भन्दै राजासहितको २०÷२५ जनाको ग्याङ् त्यहाँबाट बाहिरियो । त्यसपछि उनीहरुले राजालाई भेट्न पाएनन् । अहिले पीडितहरु राजालाई भेट्न महानगरीय प्रहरी परिसर ललितपुर धाइरहेका छन् । 
राजा आए पोखरा
राजासँगै प्रहरीले अझै धेरैलाई पक्रन बाँकी रहेको जनाएको छ । जस अन्तर्गत पोखराबाट एजेन्टको काम गर्ने एक व्यक्ति पनि प्रहरीको खोजीको सूचीमा छन् । ती एजेन्टले रुपन्देहीकी गीता पाण्डे (नाम परिवर्तन)लाई युरोप अमेरिका जाने भए राजालाई भेटाइने आशा देखाए । एकदिन एजेन्टले पाण्डेलाई भने ‘राजा पोखरा आउनुभएको छ, थ्री स्टार होटलमा बस्नुभएको छ भेट्न आउनु ।’
बेलायतको सपनामा रुपन्देहीबाट श्रीमानलाई लिएर पाण्डे पोखरा पुगिन् । राजाको साथमा ४÷५ जना बडीगार्ड थिए । बडीगार्डले भने ‘विदेश जाने को हो ? त्यसले मात्र भेट्ने अर्को बाहिर बस्ने ।’ श्रीमानलाई होटल बाहिर राखेर पाण्डेले राजालाई भेटिन् । राजाले १०० प्रतिशत विदेश पठाइदिने आशा देखाए । जसका लागि उने अहिले नै काठमाडौं जानुपर्ने बताए । र आफ्नो कारमा पाण्डेलाई राखेर राजा काठमाडौं आए । झण्डै आठ लाख रुपैयाँ पनि बुझाइन् पाण्डेले । राजा पोखरा गए, आठ लाख रुपैयाँ लिए काठमाडौं आए । 
डेढ करोड भन्दा बढी ठगी
सुरुमा आफूहरु ठगिएको भन्दै दुईजनाले महानगरीय प्रहरी परिसर ललितपुरमा उजुरी दिएका थिए । तर अहिले उनीहरु विरुद्ध दिनुहँ ठगिएको भन्दै उजुरी पर्ने गरेको छ । अहिलेसम्म उनीहरु विरुद्ध डेढकरोड रुपैयाँ भन्दा बढी ठगी भएको भन्दै उजुरी परेको र यो क्रम अझै बढ्ने महानगरीय प्रहरी परिसरका डिएसपी कार्कीले बताउनुभयो ।
प्रक्रन बाँकी छन्, अझै खोज्दै छ प्रहरी
राजाको अफिसमा काम गर्ने, कर्मचारी, सुरक्षा गार्ड, बडी गार्डलगायत एजेन्टको काम गर्नेहरुले पनि राजाको योजना अनुसार नै काम गर्ने गरेको र उनीहरु पनि दोषी हुनसक्ने भन्दै प्रहरीले खोजी सुरु गरेको छ । राजा पक्राउ परिसकेपछि धेरै जना समपर्कबिहीन छन् । ‘हामीले उनीहरुलाई खोजी गरिहेका छौं्, उनीहरु पनि दोषी हुन सक्छन् हामी चाँडै पक्रन्छौं’ डिएसपी कार्कीले भन्नुभयो ।
दुई वर्ष जेल बिताएका व्यक्ति हुन् राजा
मनोजबहादुर सिंह अर्थात राजा यो भन्दा अघि दुईवर्ष जेल जीवन बिताएका व्यक्ति हुन् । उनी २०६८ मा ठगी र हातहतियार तथा खरखजाना मुद्दामा दुईबर्ष जेल बसेका थिए । उनको घरमा प्रहरीले खानतलासी गर्दा त्यसबेला इनारमा लुकाइएको दुईवटा पेस्तोल बरामद भएको थियो । त्यतिबेला उनले विभिन्न मान्छेलाई प्रहरीमा लगाइदिने भन्दै एक करोड रुपैयाँ भन्दा बढी असुल गरेका थिए ।
कुचो लगाउने महिलाको मन पग्लियो । त्यो पेनसिलले लेखिएको कागजको टुक्रो उनले प्रहरीलाई दिइन् ...........।
गाएको यो गीतले सिन्धुलीगढी दरबार जीर्ण हुँदा पनि त्यसको महत्व र सुन्दरतालाई चिरस्थायी बनाएको छ । विजय किल्लामा बसेर चियाउँदा दरबारको मनमोहक दृश्य देखेपछि लेखिएको गीतमार्फत उहाँले सिन्धुलीगढीलाई मानिसको मुखमुखमा झुण्डिने बनाउनुभयो । 
